Psalms 84
Lavavara Ri Loogu At Ne Moroa
1Leeme Silok, nu Lanaraavuk, a vara aleng loogu laplavang taram! 2A vavara aleng i xusu ana nemen go! Am doma onon amisik uto at loogu laplavang at Leeme Silok. La anabak pixan momo mi lorooro axap tarak ti ne Moroa ni Luntoo Avolo.3Leveng kamkabilin bok dip kip levempotpos atdi ro xeneng at loogu laplavang, la larapixa lixilik (sparrow) bok din tuuna laraugu axa atdi go; la dik lok tatao luvutnitna di ro saparap larapenbon taram, nu Leeme Silok la Lanaraavuk, nu Loorong Silok la ne Moroa rak. 4Lomomo silok atnedi dik lok to at loogu laplavang taram dim suma i, atla dik pixan emi asu amisik tu.
5Lomomo silok atnedi ua nenu um taba di mi lolos dim suma i, la nedi di vavara rinotno i xusu dinat pas ngan lavaose uto lakaana Saion at loogu laplavang. 6Kuren la at loxonaleng dit pas polo lemelebu vatmang no at lasa Baka, di reven mo lenep na ravasu ngan lenep at levempuuvut dan, la leventakabu avot ik suxa i mi levempat tibung dan. 7At mo lavatpas di ruuna ka lolos maxat; la dinaba rupot to vana at loxongkaana Saion la nedi getgesara dinaba tu ro melamgo at ne Moroa.
8O Leeme Silok nu Lanaraavuk, una ronga res at lisingising tarak. O Moroa at ne Jakop, tonga ia! 9O Moroa, una lox anarong loorong atnema, mo loorong ua nenu ugara soxolik ka vam i. 10Mo legesa aleng mak lok teren to xeneng at loogu laplavang, i silok aleng ti mo legesa abin sangaun kobot aleng mak lok teren to vetpes; naba lox avukat do ana tu mun amisik to maxamang saparap lumusaragu at loogu at ne Moroa rak la nemen gat ana nemen avukat amisik to at laraugu at luvuttadi dik lok laxapmek. 11Leeme Silok neni Lurutu See Pe atnedik la ni Loorong Silok i ruuna lisisinang, la ik lox anarong dik mi lebelemumu la ik lox asilok dik kusu limixin dina lok ngangao atnedik. Neni ixom tebeng alis lempanga avukat basinge nedi dik lok luvukat.
12Leeme Silok nu Lanaraavuk, nedi di nuunu saga ram din tuuna xaka i lomomo silok!
Copyright information for
MMX